GIPAHUNONG NGA PAGTUKOD SA USA KA CONDO BUILDING SA HIPODROMO, GIBUTANGAN NA OG SAFETY NET

GIPAHUNONG NGA PAGTUKOD SA USA KA CONDO BUILDING SA HIPODROMO, GIBUTANGAN NA OG SAFETY NET

Gibutangan na og safety net sa kontraktor ang kontrobersyal nga pagtukod sa usa ka 37 ka andana nga condo building sa Brgy.Hipodromo ning syudad sa Sugbo.

Kini human gimandoan na sa Office of the Building Official kun OBO ang pagpahunong sa pagpatukod sa maong building human sa uwahing insidente niadtong Agosto 26 sa buntag dihang adunay usa ka balay ang natagakan og duha ka mga dagko ug taas nga angle bar maygani wala maigo ang tag-iya sa balay nga naghigda niadtong higayona ug nakabangon na siya.

Gawas sa maong insidente, nasuta sa DYHP RMN CEBU News Team gikan sa mga molupyo duol sa maong building nga ubay-ubay na sab diay ang mga nangatagak gikan sa taas nga bahin sa gitukod nga condo nga nangahagbong ngadto za ilang kabalayan.

Bisan gibutangan na og safety nets ang gitukod nga building, nakapangutana gihapon ang mga residente sa Sitio Green side sa maong barangay duol sa gitukoran sa condo kon luwas na ba ang maong gibutang nga safety nets.

Kini human nasuta sa pipila ka mga opisyal sa maong barangay lakip na ang barangay kapitan niini nga si Kap Ruperto ‘Dondon’ Bacolod nga wala’y nakita nga ‘catcher net’ sa ubos nga bahin nga maoy mosawo sa posibleng mangatagak gikan sa gitukod nga building.

Kamo mga kasama, igo na ba kining gitaud nga safety nets sa maong gitukod nga condo building sa Hipodromo?

via| Radyoman Aida Tampus

DYHP RMN CEBU