UPDATE POST
BALAY NGA NATAGAKAN OG ANGLE BAR, GI-REPAIR NA
Gipanguhan sa Safety Officer sa kontraktor nga nagtukod sa usa ka condominium building sa Brgy.Hipodromo ning syudad sa Sugbo ang pagrepair sa atup sa usa ka balay nga natagakan og duha ka mga dagkong angle bar niadtong Agosto 26, 2024 sa buntag.
Gitapakan na og sin ang buslot gama sa natagak nga duha ka mga dagko ug taas nga angle bar sa naapektuhan nga balay nga nahimutang duol sa gitukod nga building sa Sitio Green side sa naasoy’ng ‘ng barangay.
Una nang niluwat og kamandoan ang Office of the Building Official kun OBO pagpahunong sa pagtukod sa maong condo building human sa nahitabong insidente.
Hinoon, wala’y naangol sa maong panghitabo.
Gawas sa duha ka mga angle bar nga nahagbong ug nilusot ngadto sa usa ka balay, gibutyag sab sa mga residente sa DYHP RMN Cebu News Team nga aduna pa’y laing mga butang ang nangatagak paingon sa kabalayan duol sa gitukod nga building.
via| Radyoman Aida Tampus
DYHP RMN CEBU
